Pidato Batagak Gala
Takalo ambo ka marambah (sayo)
Di ladang koto marapak
Baringin patah tatimpo
Hanyuik kasiak badarai-darai
Jarajak di indo giri
Dipatah di lintuah-lintuah
Sungguah ambo tagak badiri (sayo)
Umpamo duduak basimpuah
Sunguahpun ka angku Datuak Rangkayo Basa………..
Di tiboan sambah jo panitahan
Mako sarapek nyo pulolah
Angku pangulu ambo (sayo)
Nan gadang basa batuah
Nan cadiak nan tau pandai
Mako sarapek nyo pulolah
Sagalo manti jo pandito
Langkok nan tuo cadiak pandai
Baiak dunsanak jo sudaro
Karik baik jo ipa bisan
Bako baki jo pasumandan
Nan mudo arih budiman
Hulu balang pagaran kokoh
Bundo kanduang samo di dalam
Dalam saruan ambo juo (sayo)
Salam disinan ditiboan
Sambah ambo sambah balirik (sayo)
Sambah dari silang nan bapangka
Jumalah karajo nan bajunjuang
Ambo palirik an di hadapan (sayo)
Angku Datuak Jingkan nan basamo
Ujuang salam ka Datuak Bakuah Ameh
Adopun salam nan ka ambo tiboan (sayo)
Mahadok kapado Datuak Rangkayo Basa
Pado wakatu iko kini
Ma ukua di ateh kayu
Ma hukum di ateh kato
Manyiang tampek nan tumbuah
Tumbuah sarupo iko kini
Puntiang tahantak ka hulu nyo
Dibawah kiliran taji
Asa mulo kato dahulu nyo
Tigo limbago nan tajali
Partamo sambah manyambah
Kaduo baso jo basi
Sambah manyambah dalam adaik
Tali batali dalam undang
Tasabuik bamuluik manih
Bapakaian baso jo basi
Di dalam bungka nan piawai
Ditaraju nan bagatok
Adaik banamo sopan santun
Katigo siriah jo pinang
Langkok timbau jo daunnyo
Talatak ateh carano (didalam uncang)
Malin putiah mangarang sangkok
Sangkok dikarang dihalaman
Makan siriah salailah rokok
Nak sanang hati si pangkalan.
Takalo maso daulu
Samusim maso saisuak
Samaso alun barabalun
Alun badusun bataratak
Alun bakoto banagari
Alun bataluak jo barantau
Alun basintuak lubuak aluang
Alun baparik pakandangan
Alun basunua kuraitaji
Alun batiku pariaman
Sasapan alun lai nyato
Alun sikilang aia bangih
Alun babanda nan sapuluah
Alun batapan indopuro
Alun nan tungga magek jabang
Alun lai ado pagaruyuang
Alun babasa ampek balai
Takalo maso lai nantun
Datanglah rajo dari lauik
Cucu zis ‘alaihi salam
Anak dek iskandar zulkarnaini
Baliau baranak tigo urang
Nan tuo sri rajo marajo ali
Nan tangah sri rajo marajo depang
Nan bunsu sri rajo mahadirajo
Pihak dirajo nan batigo
Balaia lah baliau maso itu
Iyo katangah lauik basa
Antaro ombak subarang ombak
Dilauik sailan maso itu
Dek lamo lambek balaia
Dilengoang ilia jo mudiak
Dicaliak suok jo kida
Lautan tanang bak dilenang
Aia sarupo bamban mudo
Lauik lah mandaun pauah
Tampaklah pulau sabuah
Pulau banamo lenggo puri
Balai sampai kasinan
Satibo inyo disinan
Alah sahari duo hari
Alah sapakan duo pakan
Antah barapo kalamonyo
Garaklah datang dari Allah
Tibolah silang jo salisiah
Sampai babantah bakalahi
Iyo dek rajo nan batigo
Tasabab mangkuto tanduak ameh
Cakak sialah kamalarai
Silang sia lah ka mahukum
Namonyo urang samo gadang
Turun sa urang malaikaik
Mahukum rajo nan batigo
Diambiak mangkuto tanduak ameh
Dibanam-an kadalam lauik
Balamun jo lumbo lumbo
Alah disemba ikan iyu
Alah dililik ula bidai
Alah dilingkuang nago sati
Lah sirah lauik sabalah
Kalangik bendang cahayo nyo
Nan tingga jadi pandapatan
Sampai kiniko ado juo
Pihak rajo nan batigo
Bacarai carai maso itu
Nan tuo sri rajo marajo ali
Babaliak ka banuruhum
Manjadi rajo nyo disinan
Nan tangah sri rajo marajo depang
Manuju matohari hiduik
Mandapek ka banda siam
Manjadi rajo nyo disinan
Nan bunsu sri rajo mahadirajo
Manuju bukik si guntang guntang
Duduak bamanuang surang diri
Sadang tananang bana datang
Paham tibo aka baranti
Masonyo Allah manggarakan
Allah ta’ala kayo sungguah
Mambuek barang sakandak nyo
Tibo kiamaik maso itu
Kiamaik nabi Nuah janyo urang
Habih sadonyo isi alam
Tingga sabuah parahu rajo
Sarato rakyaiknyo nan salamaik
Babaliak katangah lauik
Manuju puncak pulau paco
Dari mano titiak palito
Dibaliak teloang nan batali
Dari mano asa niniak kito
Iyo dilereang gunuang marapi
Dek lamo bakalamoan
Di dalam koto pariangan
Di balai balairoang panjang
Diluak cupak jo gantang
Disusun adaik jo limbago
Disusun luak nan tigo
Ditimbang taluak jo rantau
Di sinan lah takalo luak dibagi-bagi
Suatu luak tanahdata
Kaduo luak lubuak agam
Katigo luak limo puluah
Baitu warih nan dijawek
Dari niniak nan baduo
Dari parpatiah nan sabatang
Duo jo datuak katumangguangan
Lah lamo ambo dek marambah
Balun lai tantu karimbonyo
Lah lamo ambo dek manyambah
Balun lai tantu katibonyo
Jarajak di indo giri
Baringin di balai gadang
Takalo adaik kabadiri
Dipariangan balairoang panjang
Disinan takalo didiri-an
Basa jo urang gadang
Diagiah gala maso itu
Partamo datuak bandaro kayo
Kaduo datuak maharajo basa
Sajak dirahim bundo kanduang
Baniaik ibu jo bapak
Kok lahia anak isilam laki laki
Wajah nyo ampek parakaro
Duo sunaik duo paralu
Dikaji sunaik nan duo
Bakhikah ba tariak abuak
Dikaji paralu nan duo
Bapitah basunaik rasul
Sampai umuanyo tujuah tahun
Malam di aja nyo mangaji
Siang disuruah nyo sikola
Patang ditunjuak diajari
Lah sampai balia baraka
Ujuiknyo tigo parakaro
Partamo ka jadi imam
Kaduo ka jadi khatib
Katigo jadi pangulu.
Dihari sahari kini
Antah kutiko lah nan baiak
Antah hari ko lah nan elok
Aleklah panuah ateh rumah
Malimpah ka gulang gulang
Tagak nan alah tarajali
Duduk nan alah taraselo
Baiak liriknyo nan bak siriah
Rancak susunnyo nan bak matua
Dicaliak kapado barih adaek
Panuah sagalo runggo hati
Lipua sagalo batang tubuah
Biriak biriak tabang kasamak
Dari samak kahilaman
Patah sayok tabang baranti
Dari niniak turun ka mamak
Dari mamak ka kamanakan
Warih bajawek sampai kini
Ramo ramo sikumbang jati
Katik endah pulang bakudo
Patah tumbuah hilang baganti
Pusako lakek ka nan mudo
Ba a rupo nyo itu kini
Maso ketek banamo Si ……….
Kini di turunan gala pusako
……………………………
Mamintak silang nan bapangka
Ka niniak mamak nan basamo
Sarato alim jo ulama
Langkok jo manti jo pandito
Walaupun nan tuo cadiak pandai
Baiak dunsanak jo sudaro
Karik baik jo ipa bisan
Bako baki jo pasumandan
Hulu balang pagaran kokoh
Bundo kanduang samo didalam
Gala nak mintak di imbauan
Barantang panjang bakambang leba
Baiak di labuah nan goloang
Walaupun di pasa nan rami
Bogo disumua ditapian
Atau disurau dimusajik
Mintak dibao sahilia jo samudiak
Kok kabukik samo mandaki
Kalurah samo manurun
Ka ilia sarangkuah dayuang
Kamudiak sa antak galah
Dibao satandiang duduak
Dibao sajamba makan
Tagak dibao samo tinggi
Duduak dibao samo randah
Kok elok ratak lidahnyo
Kusuik bao manyalasai
Karuah bao manjaniahi
Kok elok ratak tangannyo
Singkek di ambiak kapauleh
Panjang diambiak kapangarek
Lampisan di baliak itu
Alam nan basipaik gawa
Manusia basipaik kilaf
Dek karano baliau nangko
Barumua satahun jaguang
Badarah satampuak pinang
Ilimu jauah sakali
Kok sasek mintak disapo
Tadoroang mintak disintak
Kok sipi bakatangahan
Adaik limbago iko kini
Mujua ndak dapek kito raiah
Malang ndak dapek kito tulak
Kok malang juo nan taraiah
Ikek jatuah baju baluluak
Hilang nak samo kito cari
Tatingga samo kito japuik
Luluih nak samo kito salam
Hanyik nak samo dipintesi
Janji nak samo ditapati
Ikara nak samo dimulia-an
Boto pacah dawaik tatunggang
Kalam patah pena baranti
Tak guno rundiang di papanjang
Jo wassalam ambo sudahi
Assalamu………………………….
